GURIT: Kang Zen (1)

http://sastra-bojonegoro.blogspot.com/

Add   

 

        Kang Zen                                                                                                                                                             

 

  

G u r u

Wong tani
Esuk repet-repet wis padha tangi
Metu saka kandhang nggeret sapi karo kebo
mikul krakal karo garu
njegur sawah
cetar... cetor…

swara pecut nggegirisi
sapi karo kebo ngubengi sawah
nggeret krakal, garu karo luku
apa ngono kuwi sing diarani guru
wong dines
Esuk nganggo sragam
Mlebu sekolahan
Nyekel kapur tulis nok ngarepe papan
Dak... dak… dak…
Mlebune sedheng molehe kurang
Apa ngono kuwi sing diarani guru
Enek pawongan
Mlebu sekolahan
Kana-kene kabeh ngundange bos
Bos… bos… bos…
Tanpa swara
nalika sang bos metu saka sekolahan
Takkira bos menehi kepinteran
Jegagik,
ilang tanpa kaweruhan
Apa ngono iku sing diarani guru
Geneya kowe takon
Urusane wong ngono beda-beda
Becik meneng supaya ora keterak garu
Sawangen mlakune krakal
Yen kowe ora pingin kesrekal
Sawangen lakune luku
Yen kowe mlaku kareben ora kesandhung watu
Aja ngrungokna swara dak
Aja ngurusi bos bos kae
kuwi urusane guru
critamu karo critaku
ora enek sing kenek didhelikno
kuwi sejatine guru

Bojonegoro, 9 Juli 2010

  

J e n g k e r

Etan Baureno
Ngidul tekan Kedungadem
Pinggir-pinggir dalan akeh wit-witan

Ngulon Sugihwaras butul Temayang
Mlebu alas banjur butul Bubulan, Ngasem nganti
Tambakrejo lan Watu Jago
Tanpa daksawang ngliwati alas blandhengan kebak wit jati
Tak kedhepna mataku
Tipet-tipet dangkel jati wis mbalek ijo
Hayo mbacutna laku
Lha dhalah ……
Wis teka Padangan
Tipet panggone prahara dhek jamane Ariyo Jipang
Leren …….
Leren dhisik
Takrungokna radio
Ndhelok tivi nok warung
Nyilek koran harian
Kurang sreg
Mbukak laptop miyak peta
Gak kaprah!
Akeh lenga gas nok Gayam karo Kasiman
Bule-bule, menteri, nganti bupati padha sliweran
Cungar-cungir nok kaca mobil
Mambu lentung
Inceng-inceng totalan produksi lenga
Gak urus aku
Wis parek esuk
Pitik padha petok
CD kalong pitung puluh lima persen
CSR nglebat nok njabane kuthaku
Aja ngantuk, le
Aja ngantuk, ndhuk
Aja ndhangak nek ulap nyawang srengenge
Mundhak lara matanem
Ngentekna ragad kanggo mbolongi sak clanane pak mbokem
Apik ndhingkluk nyawang bumi sing mbok liwati
Sing dipaculi mbah buyuttem kawit biyen
Bosen kang
Bosen Makde
Bosen Yongdhe
Kawit dhisik selegence

Aja dleming kaya wong ketempelan setan
Apa sing mbok jengker?
Sekolah larang nanging kowe bingung nyekolahna anakem
Wong lara akeh ragade

Dalan-dalan ijek elek, tibake
Aja lunga utawa dagang nek wedi keblegong
Jengker apa dleming
Gak ngerti piye
Jengker kaya wong watuk
Jengker kok kaya wong ngentut sing badheg ambune
Raksakna kowe
Titeni dhewe
Iki kutha kelairanem.

Kutha mBojonegoro, 10 Juli 2010  

Aji Cora

Ajiku Aji cora Kamandaka
Wignya ing sabda lebda ing prasetya
mring kawula dwija, maharsi saha punggawa
Prasetyaning Aji …
Kawula adamel mulya
Dwija pinunjul sujana
Maharsi adamel widya widura
Marga adamel sigra sayoga
Prasetya tan tumus ing netra
Kawula, dwija, maharsi saha punggawa
Tiwikrama mring Aji cora kamandaka
Aji selak nemahi bendhu
Aji selak bakal puput layu

Bojonegoro, 22 Juni 2010

  caption

http://sastra-bojonegoro.blogspot.com/

Gurit: Herry Abdi Gusti (1)

Herry  Abdi  Gusti

A                                                                                                                                                        

Herry Abdi Gusti : DALAN  SIDHATAN yagene  keraya-raya  lapa ing  jurang  cerung  kahanan rebut  dhucung  tanpa guna kabenthus-benthus  gubras  ludira ing  kene  ana  dalan  sidhatan sapa  bisa mbabar  patembayan aweh  sithik  bakal  kacuthik asok  akeh  ngundhuh  pikoleh sayekti  mung  madhep  pilihan sapa  waskitha  ing  pamawas bakal  ndulu  kahanan  bener suthik  nggepok  tumindak  dudu wewaler  nora  bakal  tumama nyata  kabeh  padha  dhegsiya aku  lan  kowe  siji  badhene nggayuh kamulyan  apa  kapracondhang ? # bojonegoro_2010 ------------------------------------------------------------ Herry Abdi Gusti   : ARAK-ARAKAN  RERUPAN gurung  kang  luwih  dawa  tinimbang  lurung rerasan  rinasa  panjang  katandhing  dalan arak-arakan  liwat  mripat  mbabar  kanyatan praupan  jembar ciyut  mbranang  rongeh kalingan  surem  ing  riwe  drodosan siji  mbaka  satunggal  mirong  kampuh sapecak rong pecak  malangkadhak pamer  katiyasan  umuk  kasudibyan ira  sapa,   ingsun sapa   ??? sadumuk  bathuk  pecah  dadya  unthuk   ndlidir  pacak  baris  rerupan  sadina-dina  : abang  ireng  ijo  kuning  biru  maya wungu terong abu-abu manda-manda candhala  dhegsiya  culika  dora mentala dur  ing  angkara sauntara  suwalike  ana  rupa  gumlethak  : lembah  sareh  sumarah  pasrah legawa  rila  samadya  tan  ngaya setya  tuhu  ing  sumitra suradira  sinatriya # bojonegoro_2010 ---------------------------------------------------------- Herry Abdi Gusti   : KADANG-KADANGKU  PADHA  TUMENGA dinane  iki  daksawang  kanthi  premana saka  kadohan  malah  dene  cedhakan tan  beda  ing  sakawit  panyangka jer  wus  katiti  mangkene  kasunyatan kadang-kadangku  padha  tumenga : ana  kang  tumenga  mandhuwur utawa  ndhangak  yen  lumrahe nyawang  langit  kumelap  katon  cedhak kaya  kuwawa  nggayuh  tanpa  kangelan daya-daya  kasembadan  wosing  kekarepan lintang  lan  rembulan  karayuk  sakukuban : ana  kang  tumenga  manengen utawa  kagiwang  arane maruk  kuwasa  arta  lan  wanita prabawa  rinasa  gampang  tumeka ora  saka  luhuring  pakarti  lan  dharma urip  kudune  eling  marang  sasama : ana  kang  tumenga  mangiwa utawa  keblinger  jenenge ora  madhep  mring  kang  agawe  luwih mangan tirakat  kanthi  kahanan murwat  tan nggape wanci kudune sumuyud mring kang darbe sakabehe kamulyan : ana kang tumenga mangisor utawa tumungkul  yen mesthine ora nggetuni tumindak kang nalisir nanging pangece marang sangisore ngiwi-iwi  patrap pamer dadi lumrah ngungal dhadha nilap  tepa slira             # bojonegoro_ ------------------------------------------------------------ Herry Abdi Gusti   : TAPAKTAPAK tapaktapak sikil salumahing wedhi lan krikil ninggal tilas manekawarna minangka paseksen abangirenge wewatakan sajembare ndonya bebasan umur jagung  mung sakleplasan tapaktapak  musna kasempyok ombak samodra             wusana mung dadi crita….             # bojonegoro_ ----------------------------------------------------------- Herry Abdi Gusti   : GENDERA nalika teka mangsakalane gendera enggal-enggal dakkibarake kumlebet  ing pucuke mega-mega ana rasa mongkog jroning dhadha nanging,  ahh………… yagene codhot-codhot kuwi padha lelewa bebuwang tanpa duga kedadak ana mendhung tanpa sangkan batinku surak mawurah :  horee..!  horee..! nggegadhang mendhung bisaa dadi udan kanggo ngresiki genderaku kang jibrat kotoran nanging,  ahh…………. jebul malah luntur warnane mblawus lencu guwayane Bojanegara,  1917 Caka.  --------------------------------------------------------- Herry Abdi Gusti   : PATANG TATARAN Mukminuun……… mring kang maha kuwasa sumuyud ngabekti tulusing ati linambaran kapercayan jati tan ana liya kang luwih maha Tattaquun……… ati kang tumata rila legawa madhep manteb pasrah sumarah tangan nadhah nyadhong swarga panthering donga sadhengah wayah Muhsinuun……… mbagusi urip srana pakarti luhur sumbut klawan ucap tutur nengenake tumindak aweh tuladha nora ngumbar swara ngudal ukara Mukhlishuun……… bawera jroning dhadha tan ana ngresula ngulungna luwih utama katimbang ngathong jer kabeh panduwe mung titipan saderma manungsa lair kanthi kahanan kothong @J’negoro-2010 ---------------------------------------------------------- Herry Abdi Gusti   : ARUMING KEMBANG-KEMBANG RINONCE ibere manuk gagak nyenggol pang semboja gawe gogrog kembang putih nyebar wewangi ing lemah bang siji mbaka siji tumiba….. banjur ana tangan alus kang sumadya ngluru kembang-kembang pating blasah rinonce dawa kanthi benang sutra….. aruming  kembang-kembang rinonce endah ngrenggani janggane ibu pratiwi ngambar-ambar  saindhenge  nuswantara…..                                   @Bojonegoro’98

       n

Herry Abdi Gusti :

DALAN  SIDHATAN

yagene  keraya-raya  lapa

ing  jurang  cerung  kahanan

rebut  dhucung  tanpa guna

kabenthus-benthus  gubras  ludira

ing  kene  ana  dalan  sidhatan

sapa  bisa mbabar  patembayan

aweh  sithik  bakal  kacuthik

asok  akeh  ngundhuh  pikoleh

sayekti  mung  madhep  pilihan

sapa  waskitha  ing  pamawas

bakal  ndulu  kahanan  bener

suthik  nggepok  tumindak  dudu

wewaler  nora  bakal  tumama

nyata  kabeh  padha  dhegsiya

aku  lan  kowe  siji  badhene

nggayuh kamulyan  apa  kapracondhang ?

# bojonegoro_2010

------------------------------------------------------------

Herry Abdi Gusti   :

ARAK-ARAKAN  RERUPAN

gurung  kang  luwih  dawa  tinimbang  lurung

rerasan  rinasa  panjang  katandhing  dalan

arak-arakan  liwat  mripat  mbabar  kanyatan

praupan  jembar ciyut  mbranang  rongeh

kalingan  surem  ing  riwe  drodosan

siji  mbaka  satunggal  mirong  kampuh

sapecak rong pecak  malangkadhak

pamer  katiyasan  umuk  kasudibyan

ira  sapa,   ingsun sapa   ???

sadumuk  bathuk  pecah  dadya  unthuk  

ndlidir  pacak  baris  rerupan  sadina-dina  :

abang  ireng  ijo  kuning  biru  maya

wungu terong abu-abu manda-manda

candhala  dhegsiya  culika  dora mentala

dur  ing  angkara

sauntara  suwalike  ana  rupa  gumlethak  :

lembah  sareh  sumarah  pasrah

legawa  rila  samadya  tan  ngaya

setya  tuhu  ing  sumitra

suradira  sinatriya

# bojonegoro_2010

----------------------------------------------------------

Herry Abdi Gusti   :

KADANG-KADANGKU  PADHA  TUMENGA

dinane  iki  daksawang  kanthi  premana

saka  kadohan  malah  dene  cedhakan

tan  beda  ing  sakawit  panyangka

jer  wus  katiti  mangkene  kasunyatan

kadang-kadangku  padha  tumenga

:

ana  kang  tumenga  mandhuwur

utawa  ndhangak  yen  lumrahe

nyawang  langit  kumelap  katon  cedhak

kaya  kuwawa  nggayuh  tanpa  kangelan

daya-daya  kasembadan  wosing  kekarepan

lintang  lan  rembulan  karayuk  sakukuban

:

ana  kang  tumenga  manengen

utawa  kagiwang  arane

maruk  kuwasa  arta  lan  wanita

prabawa  rinasa  gampang  tumeka

ora  saka  luhuring  pakarti  lan  dharma

urip  kudune  eling  marang  sasama

:

ana  kang  tumenga  mangiwa

utawa  keblinger  jenenge

ora  madhep  mring  kang  agawe  luwih

mangan tirakat  kanthi  kahanan murwat 

tan nggape wanci kudune sumuyud

mring kang darbe sakabehe kamulyan

:

ana kang tumenga mangisor

utawa tumungkul  yen mesthine

ora nggetuni tumindak kang nalisir

nanging pangece marang sangisore

ngiwi-iwi  patrap pamer dadi lumrah

ngungal dhadha nilap  tepa slira

            # bojonegoro_
------------------------------------------------------------

Herry Abdi Gusti   :

TAPAKTAPAK

tapaktapak sikil salumahing wedhi lan krikil

ninggal tilas manekawarna minangka paseksen

abangirenge wewatakan sajembare ndonya

bebasan umur jagung  mung sakleplasan

tapaktapak  musna kasempyok ombak samodra            

wusana mung dadi crita….

            # bojonegoro_
-----------------------------------------------------------

Herry Abdi Gusti   :

GENDERA

nalika teka mangsakalane

gendera enggal-enggal dakkibarake

kumlebet  ing pucuke mega-mega

ana rasa mongkog jroning dhadha

nanging,  ahh…………

yagene codhot-codhot kuwi

padha lelewa bebuwang tanpa duga

kedadak ana mendhung tanpa sangkan

batinku surak mawurah :  horee..!  horee..!

nggegadhang mendhung bisaa dadi udan

kanggo ngresiki genderaku kang jibrat kotoran

nanging,  ahh………….

jebul malah luntur warnane

mblawus lencu guwayane

Bojanegara,  1917 Caka.

 ---------------------------------------------------------

Herry Abdi Gusti   :

PATANG TATARAN

Mukminuun………

mring kang maha kuwasa

sumuyud ngabekti tulusing ati

linambaran kapercayan jati

tan ana liya kang luwih maha

Tattaquun………

ati kang tumata rila legawa

madhep manteb pasrah sumarah

tangan nadhah nyadhong swarga

panthering donga sadhengah wayah

Muhsinuun………

mbagusi urip srana pakarti luhur

sumbut klawan ucap tutur

nengenake tumindak aweh tuladha

nora ngumbar swara ngudal ukara

Mukhlishuun………

bawera jroning dhadha tan ana ngresula

ngulungna luwih utama katimbang ngathong

jer kabeh panduwe mung titipan saderma

manungsa lair kanthi kahanan kothong

@J’negoro-2010

----------------------------------------------------------

Herry Abdi Gusti   :

ARUMING KEMBANG-KEMBANG RINONCE

ibere manuk gagak nyenggol pang semboja

gawe gogrog kembang putih nyebar wewangi

ing lemah bang siji mbaka siji tumiba…..

banjur ana tangan alus kang sumadya

ngluru kembang-kembang pating blasah

rinonce dawa kanthi benang sutra…..

aruming  kembang-kembang rinonce

endah ngrenggani janggane ibu pratiwi

ngambar-ambar  saindhenge  nuswantara…..

                                 

@Bojonegoro’98

Geguritan: Nono Warnono (1)

Bowerno 1

           Nono Warnono

KUSIR TUWA ING NDHUWUR KRETA

Jaran nurut kapecut ndhegar-ndhegar
lis sinendhal ginelak playune yayah kitiran
krenggosan
ngampet tajeme krikil-krikil ratan
saka koplakan siji marang koplakan liyane ngono sateruse
(Jaran: telekkuk kanggo cacadan turut dalan
Ah! kringetku kanggo bancaan
jinantra rodha kreta gumerit sesambat dawa
sing nunggang buta-buta
lan duratmaka sinamudana
liwat kutha lumebu desa ngadesa
mbentus watu nerak juglangan
(Kreta: ing gelis rodhaku ana pangupa jiwa)

Kang Kusir
lungguhane kreta tansaya empuk kena kanggo ngantuk
wegah mudhun nganti pikun
anak putu ngantu-antu kalodhangan
ah! mokal kasembadan
(: dak anti apa kang bakal dumadi yen jaran wus padha mbalela)

Kang Kusir,
iki kreta kraton
dudu lungsuran kreta warisan
nora kanggo kroyokan

Pasinan-Baureno Bjn 1993


Jaya Baya No.32/11 April 1993



L A Y O N
(Kanggo: Suripan Sadi Hutomo)

kawuri papan iki rinasa bawera ngrebut pandulu
akeh kang padha gegojegan nggaru-mluku imajinasi
tinanduran gurit ledhung-ledhung
katresnan bun-bun esuk pinencokan ing pucuk-pucuk gegodhongan
lan sore manuk-manuk mabur kekiter wewuyungan

jaman rodha cakra manggilingan
papan iki wus dadi kuburan sangar samun
akeh bocah-bocah lola padha nangis sesenggrukan
ndedonga nyekar bapa biyung kang wus nora kinrawuhan
bebarengan angslupe susastra kelangan cahya

mbokmanawa kowe lan aku dina iki isih kuwawa
kanthi sisa pegat-pegat ambegan
nglacak lan njumputi geguritan-geguritan cicir nadyan
kesandhung-sandhung kontal tinendhang bal globalisasi
sesambat tangis layung-layung

gelis angemasi?
apa ngrantu tumekane reinkarnasi?

Wengi Mendhung Poncot 1996


Panjebar Semangat No.12/23 Maret 1996
________________________________________________________________________


P A N D A K W A

ah !
apa ora rumangsa
apa ora rinasa
nalika driji aweh panuding marang wong liya
papat liyane ngarah marang sapa ?
: terwaca

Bojonegoro 1995

Panjebar Semangat No.17/27 April 1996
________________________________________________________________________

W A T U

anamu atos pathing pendhosol pengkuh dadi pakewuh
ing dalan minangka sandhungan ing samodra njelma watu karang
wola-wali sinempyok ombak malah landhep nggegirisi
apa sejatine kang lagi ko paragani ing bebadra iki

playumu ing kutha dadi tetanduran gedhung sundhul ngawiyat
ngliyer omah-omah cilik nganggo buldoser dadi tangis
njur pasulanan rebut panduman kanthi kolusi
lan maneka paekan kemunafikan

anamu ing jro dhadha dadi ati lan rasa pangrasa atos
wengis mentalan nggiles semut-semut ing poncot gang
watu-watu gudras getih abang amelereh
apa kuwawa dadi tumbal wadal raharjining sasama
apa malah dadi margining kadurakan

Bojonegoro, 1995


Mekar Sari No.45/03 Januari 1997

Geguritan: Asrul Irfanto

____________________________________________________________________________________
HAYAM WURUK WANCI DALU

wadhuk gondhang mandhape wolu-wolu
sinekar dening sindhen dhingklik sinambi atur guyu
nambahi kanikmatan lehku nenggak angeting ciu
ing sawijining wengi ana dalan hayam wuruk wanci malem minggu

senajan gendul-gendul wis pathing klemprak
ning isine ora kuasa nelesi gorokanku kang tansah krasa ngelak
ngundang lumahing centhak supaya enggal kaisi segering towak
amrih bisa ngusadani rasaning ati sing ketlarak-tlarak

caping gunung mandhape kutut manggung
kasambut seblaking sampur kang cekap kaganti kain sarung
saderma dadi tamba rasa ati bingung
marang kahanan ruwet nyandhung nyrimpung

nyidham sari mandhape aja lamis
ndherekake sumingkiring wengi kang katundhung embun atis
ninggalke aku kang mung isa ndhodhok ndhepipis
kaya lelakonku ing wengi-wengi kang uwis-uwis

Bojonegoro,7 April 2010
____________________________________________________________________________________

HADHUH BIYUNG

biyung...
tulungana anakmu kang lagi bingung
ningali kahanan kang nyrimpet nyandhung
sirah ngelu pindha ketiban watu gunung

bapa...
panjenengan mugi kersa paring usada
maring kuciwaning raos manah kula
dhumateng kahanan ingkang kados punika

sedaya peteng tanpa katingal padhang
jaman mardhika nanging kados jaman perang
boten pedhuli sanak punapa kadang
waton ganyang sinten ingkang dados pepalang

boten pedhuli pulisi
boten pedhuli mahasiswa utawi mahasiswi
ugi para pamong praja negari
sedaya tingkahipun ketingal sami

ceriwis
lamis
bengis
handadosaken manah punika miris

Bojonegoro, 05 Maret 2010
____________________________________________________________________________________

G E M B L U N G

mabur
dhuwur
angen-angenku tan kena diukur

mblayang
nora karuan sing digadhang
lamunanku sundhul awang-awang

urip mukti
murah sandhang murah pangan
uga tansah kebak kamulyan

ning apa sing digawe nggayuh
pakaryan ora gableg
sebab kepinterane wis ora kajen
disingkirake karo sing pinter asok sajen

anane mung ngedumel
ngomel kaya modin kurang ambeng
maido kasunyatan urip
tambah dina sangsaya puret
ati karep bandhane cupet

Bojonegoro, 26 Maret 2010
____________________________________________________________________________________

PADHEG ISUK ING KALISARI

swara jago kluruk
pratandha wis tumekaning esuk
nglengserake atis wengi kang dudu-dudu
nundhung kanikmatan sajroning anget lan arum ragamu

jenggirat aku enggal tangi
kudu mungkasi lakon katresnan suwengi
antaraning aku lan sliramu
tanpa perduli pangandikaning liyan kang ngucap saru

nanging apa kang dadi atimu
ndadak kokbalekke apa kang dadi duwekmu
lembaran dhuwit kang dakdudut saka dompetku
minangka tandha pangucaping rasa matur nuwunku

menawa kurang akeh pawewehku
apuranen aku merga ya mung kuwi duwekku
asil seminggu olehku mburuh macul
ing sawah garapan sing sebahu wae ora punjul

kaya kesamber bledhek rasaning sirah
mireng aturmu marang aku
"ora.. mas, ora..."
"aku ora butuh dhuwitmu iki"
"kabeh paringanmu mau wis ngluwihi cukup"
"mung siji panjalukku"
"gawanen aku mentas saka jurang kanistan iki"
"kahanan sing selawase ora nate dak arep-arep kelakon ana uripku"
"senajan sliramu mung buruh macul"
"ning katresnanku iki tulus sajroning ati"
"bakal dak gawa tumekaning pati"

Bojonegoro,05 April 2010

Geguritan : Djayus Pete (1)

___________________________________________________________

PRAHARA

kapuk randhune rakyat
mabul-mabul ing ngawiyat.

Purwosari,1975
__________________________________________________________

MARANG PARWATI

ing dhadhaku: gunung merapi
gunung merbabu ing endi, wati?
merbabu kang tanpa nyawa
tanpa kemrengsenge rasa?
merapi lan merbabu
kumpul cedhak sadawane wektu
wengi-wengi kemulan pedhut
wengi-wengi kemulan slimut.

Purwosari,1976
____________________________________________________________

KANGGO NINIK,JEPON-BLORA

Ninik Jepon dadi lakon
ninggal anak suson, kelon-kelon
wedhak gincu sangune luru-luru
adhang-adhang Blora, Rembang
Lasem, Tuban tekan Cepu
rasa perih diulu.

Ninik, ooo..., Ninik
tak rungokake critamu
bojo minggat, katut randha, lali kiblat
yaiki, Nik, gelaring jagad
kebak barat, sapa sing kuwat
banjir bandhang gemulung nrajang
tekan kowe, kentir, ketangsang-tangsang.

Baliya , salina klambi sing garing
anakmu wayahe nyusu, njaluk dililing
kaya dhisik, golek kayu tanpa gincu
mulih ngasar, bening mripatmu, sumunar
gawe sengsemku andulu
wong ndesa sing lugu

Tobo,Bojonegoro,2010

___________________________________________________________

Geguritan: Gampang Prawoto (1)

       Sastro Widjoyo Diran, 01 

 http://sastra-bojonegoro.blogspot.com/

_____________________________________________________________________________

       SWARA BEDHUG

       Ing sisih kulon

       ngegla cahya mbranang

       surup, candikala

       ngeterake rina lan mapag wengi

       saka wetan

       dakrungu swara bedhug

       kang miyak watese ati lan ati

       gilir gumanti

       silir-silir …

       swara adhan…mbuka rasa

       sanalika,

       gawe gumregahe ati kang rengka tetaunan

       ngliwati dina-dina kang sepa

       kebak panggodha,

       dakpungkasi kamurkaning uler-uler

       kang ngrangsang ijo gegodhongan

       jroning alas jati kang kebak wewadi

       ing wulan pasa

       dosa dosaku kinapura

       ing sasi kang suci

       dosaku lebur dening pangastuti

       mungkasi panelangsane

       enthung gumantung nglantung

       tirakat

       sadurunge mbabar elar wujud kupu

       kekitrang miyak jembare awang-awang

       ing dinten riyadi

       Pejambon, 12082010

_________________________________________________________________________________

       REMBESING BUN ATI

       jinejere lembaran dluwang wingi

       dinamu kepungkur wus bacut nyuwek ati

       dadi bon girik, nyaur kudune

       yogene

       ming sacuwil layang

       lembar setangkep nunut ibere dara

       gambar bedhug sajagrage sinerat

       “sugeng riyadi”

       dadi panebuse

       ora cukup,

       yen mung parsel pitukone

       buntelan “uteg” jamuren

       kalengan-kalengan “ati” kang neyeng

       cemilan “ilat” gurih borakan

       gendulan sirup “rasa” gula semu madu

       sajroning kranjang gedhe nglumpuk

       “dosa-dosa” kadaluwarsa, nylempit ukara

       ukara ngemu formalin, tinata jinejer pada

       rinakit gurit “nyuwun pangapura”

       jembare jagad ginelare urip

       sadawane pikir sajroning rasa

       kebacut sigar rowahraweh saka

       ketiga dawaning ati, kebak sundukane

       yogene

       “lamun niat sesuci padasane sing kudu mara nggoleki”

       ming bun-bun “idul fitri” kang mrembes

       nelesi rasa rosaning qolbu, ngebaki jiwa jiwangga

       aking

       “wudlumu”

       lumuber “pangapura” marang sapadha

       banjire “pangampunan” saka Gusti kang maha kuasa.

       Pejambon, 091007

GURIT Lina Kelana "Lintang Semaput"

LINTANG SEMAPUT
Dening: Lina Kelana

Ben wengi lingsir
aku lungguh nang amben mangku kalkulator
ngitungi lintang lintang kang ambyar ngebaki jagad
siji....loro....telu...papat......
tak itung nganti mripatku lamur

Cemlorot………. ,
lintang nyunari sukma
ning geneya!
ana sawijineng lintang, sunare riyep riyep
kaya wong ora turu sepuluh dina

Ana apa kowe lintang?
kabeh lintang padha sumringah bungah
lha kok kowe acum ra duwe daya,
kenapa kowe lintang?

dakseleh kalkulatorku
tak parani lintang kang siji kuwi,
mripatmu teles, banjir kaya kali kunang
lan iku....?!
dhadhamu mbredheli
sinawang abang mongar mongar
kowe kenapa lintang?

Lintang liyane nyedhak,
nguwasne aku, njur ngomong karo mbrabak !

kowe isih takon kenapa?
rungokno sira kabeh,
kowe kowe, sing marakake lintang dadi kaya ngene,
kowe, sing seneng ndhaguri kulit alus tanpa bolot,
kowe sing mretheli tetanduran ijo royo royo,
kowe kabeh ,sing royokan bandha warisane sedulurmu,
sing ngeruki ambegan ambegan jroning bumi,
ngodot lan nglempit ilat ilat kang kepleset lathi
kowe kabeh nyolong cahyaning (lintang) iki

O…., wong wong kang ora duwe maesan
elinga, kowe isa nguwasi wengi sebabe aku
elinga, turumu angler amergo aku
elingana, aku isa mateni isukmu

Eling...., eling...., eling elingana.....
lintange saiki semaput,
ora sumringah, nggeguyu kaya biasane
sebab, gumembyar padhange wis kok cacah-cacah ning kalen buthek,
peceren ngisor kiwan

Eling...., eling...., eling elingana.....
lintang panjering wengi bakal mati kesikso lakon

Eling...., eling...., eling elingana.....
balikna nyawane lintang sing kokpendhem jero nang lempitane bantalmu
gage tangio,
ngusap luh kang mili deres nang pluluk’e lintang

Gugah lintang ...
gugah lintang ...
gugah lintang ...
gugah lintang ...
Gugah lintang ...
gugah lintang ...
supoyo uripmu gemontang,
kinormat dhuwur kaya lintang ning angkasa.

Babat-Jonegoro, April, 2010